PIOSEK Smaczne regionalne jedzyni, piekny program artystyczny, fajno zabawa dlo małych aji wielkich, a kupa szumnych traktorów, starych aji ganc nowych – tak by się w skrócie dało opisać tradycyjne dożynki w Piosku.
Od samego poczóntku sie było na co dziwać. Ludzie mógli oglóndać szumne traktory od gazdów ni jyny z Piosku, ale aji z inszych dziedzin –
wielki,
małe,
nowe,
stare,
kómbajny a dalszóm technike.
Sómsiedzi z Jabłónkowa, Bukowca, Hyrczawy a dalszych dziedzin prziniyśli przeszumne wiynce dożynkowe,
kiere fajermani z Piosku wieszali nad bine.
Zebranych gości prziwitała pani starostka Piosku Věra Szkanderová,
przemówił aji ksióndz Grzegorz Oziębłowski,
a wszeckigo dobrego Pioszczanóm życzył starosta Jabłónkowa Jiří Hamrozi.
Starosta Hyrczawy Peter Staňo zaśpiywoł
z Trombitášami Štefánikovcami.
Zagrały gorolski kapele Lipka
a Nowina.
Prymasz Nowiny Peter Byrtus zebroł na scene aji swoigo sztyrzrocznego synka.
A jak Nowina zaczła grać „Janiczek trowe siecze,” Mirek Łysek porwoł swojóm paniczke do tańca.
Ludzi sie w Piosku zeszło szwarnie,
dziywczynta ich witały kołoczkami.
Kogo bił głód, kupił se kołocze,
fajne bachora albo placki,
kiere piykły panie z Miejscowego Koła PZKO. O północy snodzi wszeckim budóm doszło jedzyni.
Karol Skupień powiynszowoł pani Krenżelokowej, kiero miała 90. urodziny.
Na scenie, kierej „szefowoł“ Karol Skupień, sie furt cosi robiło – od popołednia aż do nocy. Wystómpiły mażoretki Pietrovki, Peter Borkovec ze Superstar, Dr. Ong a Abba Revival. Wszecy sie bawili skoro aż do rana.
Zatańcowali Magurzanie z Łodygowic,
Drevár z Krásna nad Kysucou,
Zaolzi a przedtym eszcze mali gałgani ze Zaolzioczka, kierym zaś kozy wlyzły do kapusty.
Pan Sebastian Suszka – Kamiński z Istebnej za dwie a pół godziny wyrzezoł motorowóm piłóm szumnóm sowe.
Pan Stanisław Baselides z Jabłónkowa przedowoł swoje palice,
zrynczne dziywczynta malowały, zdobiły,
nikierzi se wyprugowali, jak sie kiejsi mleło na żarnach.
Dzieci se niechały pieknie pomalować swoje gymbulki,
a nikierzi se zrobili selfie,
dalsi sie niechali wyfotografować na pamióntke.
A nie chybiała ani tombola, na Monike Byrtus sie uśmiychło szczynści.
A kómu nie starcziło podziwać sie na traktory na poczóntku, móg ich oglóndać, jak uż stoły zaparkowane wedle na łónce.
Komentáře
