JABŁONKÓW W sobote w jabłónkowskim rokaczu uż po sztworte sie starali dać do kupy folk z rockym. I podle wszystkigo sie jim to podarziło. Że to była dobro akcja twierdzili jak ludzie, kierzi prziszli, tak zespoły, kiere wystympowały.
– No, prowda je tako, że była wielko szkoda, że my to nie zrobili na polu. Ale jak my sie pore dni przed akcjóm dziwali na prognoze pogody, tak miało loć, i tóż tymu my wielkóm scene na polu nie stawiali. Drugo wielko szkoda była tako, że nie przijechoł ze Słowioków zespół Drevár, bo gdyby przijechoł, tak by potym musioł iść do karanteny. Ale inaczyj se myślym, że sie w tym roku Folk and roll wydarził fakt pieknie – powiedzioł Jurek Goryl z Rock Cafe Southock.
Isto nie cygani, po podle informacji, kiere mómy, tak sie partyja bawiła minimalnie do pióntej do rana. A pojodała ku tymu nie jynym kołocze czy jelitka z kapustóm, ale też placki, kiere piykło PZKO z Bukowca.
Trzeba też napisać, że w tym roku ci, co robióm w rokaczu, byli na akcji aji pieknie obleczóni. Niechali se uszyć rokaczowe gorolski koszule na miare i hardo w nich paradowali. A że koszule sie moc podobały aji inkszym, tóż wylosowali jednego człowieka, kierymu takóm koszule niechajóm uszyć.
Foto: Michal Raszka @sxe_takepic
Komentáře
