CZESKI CIESZYN W sobote przi Olzie na granicy groł Blaf. Konkretnie groł a śpiywoł po naszymu pod gołym niebym przi ośrodku kultury, kaj organizujóm teraz koncerty „Lato na Strzelnicy“.
Po koncercie, kiery sie ludzióm fest podoboł, my porwali kapelnika Blafu Tomáša Tomanka bokym i zaczli my go spowiadać. Chociaż uż był wieczór, to ciepło było fórt jako w połednie, tóż my sie go nejprzód spytali:
Jako sie wóm gro w taki hyca?
No, przed tym wieczornym granim na Strzelnicy my se dali we trójke takóm godzinowóm rozgrywke kolegowi w Ropicy na wiesielu. Także teraz to grani w ciyniu, o siódmej wieczór, w porównaniu z tym wiesielim był taki jyny relaks.
Co robił Blaf, jak mu koronawirus zakozoł grać?
Blaf mioł z koncertowanim pauze od 15. 2. do 13. 6. Skónczili my na Skałce a za sztyry miesiónce my se tam wrócili. Odpadła nóm praktycki połówka koncertów a isto bedóm odpadować dali. Ale my nielynili i natoczili w GM Studio w Jabłónkowie nowe album. Schodzali my sie tam od maja do teraz, a wdycki tak maksymalnie we trójke. Album se beje nazywać SZUFLODA a je podpisane Tomáš Tomanek z Blafu. Je to taki mój solowy projekt, za kiery kupa wdziynczim, co se upraw a aranżma dotyczy, gitarzistowi Honzowi Pazderowi a synkóm z Blafu.
Kaj w nejbliższym czasie bedziecie grać?
Bluegrass jam w Loděnici pod slezskoostrawskim hradym. Dali w Gutach fajermanóm a też aj na Dogmaratonu. Tam bedymy grać aj prawdopodobnie psóm. A potym na Farmařských slavnostech w Koniakowie. Tam to asi beje aj dlo kur, gynsi, trusioków, baranów, prosiónt przez krowy, byki kónie. Na wszeckich ludzi sie ale też strasznie moc cieszimy.
Komentáře
