PIOSEK Zespół pieśni i tańca Olza, kapela Galax, super partyja, smaczne jedzyni a dobry sznaps. To sie potym baluje fajnie. W Piosku u Łabaja sie w sobote bawiło prawie 150 ludzi – dómowi aji goście.
„Nasz bal je ganc dlo wszeckich. Dlo Piosczanów, dlo Bukowianów, dlo Goroli i dlo Dolanów. Prziszli ku nóm aji goście z Jaworzynki, Kóniokowa a z Istebnej. Przedali my 150 miejscówek, jyny że nas zaatakowała epidemia grypy, tak tych ludzi je możne kapke miyni,” powiedzioł jedyn z organizatorów, Jan Michalik młodszy.
„Mómy to zorganizowane tak, że PZKO zabezpieczo bar, korbaczyki, ciastka a oczka a tak dali. Kuchnie mo na starości gospodzko Alenka Samcula. Sóm my zegrani a wszecy wiymy, co mómy robić. Gospodarzami balu sóm latoś Elka a Jurek Heczkowie spod Girowej. A wdycki sie nasze bale odbywajóm w restauracji u Łabaja,” dodoł Jan Michalik.
W Piosku sie na tradycyjnym balu bawili wszecy dogrómady aż do biołego rana. „Tym razym mMuzyka grała do pióntej a potym my eszcze z dobróm godzine śpiywali. Roz było tak, że sie wsadzili a muzykanci grali aż do dziesióntej,” zakoncził Jan Michalik.
Komentáře
