MOSTY KOŁO JABŁÓNKOWA Do biołego rana tańcowali w Kasowym na 44. „Międzynarodowym przeglądzie kapel ludowych oraz zespołów folklorystycznych” i „Balu Gorolskim” miłośnicy folkloru. Ludzie tańcowali, aż drzazgi leciały, grali a śpiywali, podziwiali tancerzy ze zespołów, kiere wystympowały na przeglóndzie. Kiela kiyrpców sie tam zedrziło, a kiela półek wypiło.
Nie było sie co dziwić, bo po dwóch rokach sie zaś mógli spotkać w Kasowym miłośnici folkloru i bawić sie na całego przy kapelach ludowych.
-Ostatni Bal Gorolski był w 2020 roku, potym prziszeł kowid, nic my nimógli robić, żodnej zabawy nie było. W zeszłym roku my w maju zorganizowali przegląd, ale teraz sie zaś mogymy pobawić, jako my byli zwykli. Taki program, jaki tu je dzisio, nie uwidzicie w całej Europie – prziwitoł wszeckich Alojzy Martynek, kiery na zmiane z Andrzejym Niedobóm prowadzili cały wieczór.
A mioł prowde. Zaproszóne zespoły pokozały to nejlepsze, co umióm. Na samym poczóntku Gorole z Mostów zaśpiywali jabłónkowski kantyczki od Adama Sikory, z kierymi kolyndowali na świyntego Szczepóna.
Potym już na parkiecie wywijali tancerze z ostrawski Šmykni, prezentowali folklor słowiacki. Zagrała cymbałowo kapela Friš, zaśpiywoł Ján Ambróz. Tyn ni jyny pieknie śpiywoł, patrzi ku nejlepszym śpiywokóm ludowym na Słowiokach, ale starczył aji porwać dziywczacko z publiczności i pokozać, że aji pieknie tańcuje.
Ni mógli chybieć Wałasi z Istebnej.
Dalszym zespołym, kiery dzwignył publiczność ze stołków, był Raslavičan z Raslavic. Grała Ľudová hudba Stana Baláža, śpiywały trzi piekne dziywczacka, kiere sie aji tak pieknie nazywały Krasotky.
Gwoździym programu był madziarski zespół Fitos Dezsö Társulat z Budapesztu. Jak zaczli wywijać, skokać, kopać nogami – to była tako rychłość, że to ani nejlepszy fotoaparat nie był wstanie zachycić. Fotke szło jyny zrobić, jak sie kłaniali.
Tako energia szła ze sceny, że jim ludzie na stojónco klaskali. Choć program trwoł trzi godziny, to nie było ani chwili, aby sie nudzić. Kłobuk na dół przed organizatorami. Zaś nie zawiydli i było co podziwiać.
Jak był chwila przerwy, trzeba naloć półke.
Tych reporterów, fotografów, kameramanów było wiyncej niż dość…symtam aji zawadzali, ale co już. Jak trzeba wszystko skrupulatnie zdokumentować, to trzeba ich kapke tolerować.
Po programie sie zacznył bal. A jak inaczyj niż od chodzónego.
Nowoczesny gorol aji na Balu Gorolskim musi być online.
Jako to tyn tata dycki robi? Aha, docióngnyć smyczek. I mogym grać.
Trzeba porzóndnie zawiónzać kyrpce.
Sprawny gospodarz balu musi wszyckich poczynstować.
Na parkiecie było fórt pełno, tak sie tańcowało aji w piwnicy.
Ján Ambróz opowiado chłapczyskóm, co trzeba robić….
….. aby aji w starszym wieku mieć energie na rozdowani i wywijać bez kónca z młodymi dziywczackami.
Gorolsko dieta…
A potym do biołego rana wszyscy tańcowali, śpiywali, cosi też pojedli a wypili. Gorolski stroje łoblykli aj ci nejważniejsi panowie a jejich baby, tak na sali nie szło poznać, gdo je dyrektor a gdo bańkorz z werku.
Komentáře
