BYSTRZYCA Latoś na Zlocie była tak jedna piónto ludzi, co dycki. MK PZKO Bystrzyca, kiere Zlot organizuje, z tym ale rachowało. Zaś ci, kierzi prziszli, sie bawili tak samo dobrze, jako dycki.
Isto wszyndzi sie teraz mówi, że w tym roku na Zlocie było mało ludzi. No, to zależy. Do nikierych organizatorów akcji koło tysiónca ludzi może być jak wygra we sportce. Do inkszych nic moc. Prowda je, że w porównaniu ze Zlotami z przedeszłych roków, było ludzi o wiela miyni. A to tymu, że organizator – MK PZKO Bystrzyca – to kapke zmiynił – i pozwoł tym razym głównie polski kapele a ku tymu ty nowsze. Moc ludzi tymu nie prziszło, bo kapel nie znali.
Z drugi stróny, ty zespoły, kiere na Zlocie telki dekady grały, i kierych pieśniczki wszecy znajóm na pamiynć, uż przestały grać albo za niedłógo przestanóm. Także trzeba było kogosi nowego (Akurat, Zakopower), gdo sie głównie młodym podobo.
Latoś też nie było żodnej czeski ani słowiacki gwiazdy, i to sie kupa ludzióm też nie podobało. Czy to uż tak zustanie, sie ukoże za dwa roki na dalszym Zlocie. Co sie ale nie zmiyniło ani kapke je to, że skoro wszecy, kierzi w sobote na Zlot prziszli, sie fakt dobrze bawili.
Foto: ikz (8), Darina Gociek
Komentáře
