WYNDRYNIA Sezon balowy je zakończóny. Ostatnim balym był Bal Seniora, kiery je tradycyjnie organizowany w Czytelni we Wyndryni przez MK PZKO Wyndrynia.
Bal Seniora sie organizuje w poniedziałek, bo przeca pyndzjóniści nie muszóm rano stować do roboty a w sobote kupa z nich wachowało wnuki, bo młodzi sie bawili na Ostatkach.
–Jo nima jeszcze emeryt, ale w sobote my balowali z wnukami, tak my z żónóm prziszli potańcować dzisio – wyjaśnił wicefójt gminy Boguś Raszka, co robi na Balu Seniora.
Zaczło sie od tradycyjnego poloneza, kiery poprowadził Karol Roszka, ale w tym roku ni ze swojóm żónóm, ale ze sómsiadkóm. – Ta moja by to nie uszłapała, mo cosi z kolanym, tak żech popytoł sómsiada, coby mi pojczoł swojóm kochanóm – wyjaśnił Roszka.
Jeśli se kiery myśli, że na balu emerytów sie jyny plotkuje, tak sie fest myli, bo seniorzi zapełnili parkiet zaroz przi piyrszych taktach.
A co trzeba podkreślić, tańcowali wszystko – disco, polke, walczyk, walc, slowfoxtrot, tango, ani na rokendrola sie nie szli siednyć i wywijali jako za młodu.
Na bal przijechali goście od Jabłonkowa aż po Cieszyn.
Krople na lepsze zdrowi.
Każdo paniczka dostała kwiotko a puse.
Ja, ta je piekno, tu wyglóndóm młodszo.
Aji pyndzjóniści focóm telefónami. A mieli co focić, bo był też program kulturalny – Gimnaści postawili piramidy, a Baby Karola pieknie zatańcowały. Ale ni jyny.
Potym podowały smacznóm wieczerze.
Nie brakowała tombola.
Do tańca senioróm groł wiecznie młody DJ Młynek.
Był to bal nad bale!