ISTEBNA Kiejski aji Istebna patrziła ku Jabłónkowu – pisoł Karol Piegza w swoi ksióżnce pt. Sękaci ludzie. I toż my sie wybrali na Istebnóm, kaj w weekend obchodzili XXII Dni Istebnej.
W Amfiteatrze Pod Skocznióm (obok boiska piłkarskigo, czyli kónsek od Biedrónki – dlo tych, gdo by nie wiedzioł) sie mieszkańcy Istebnej – a ni jyny uni – w sobote i w niedziele dobrze bawili.
Bogaty program kulturalny, koncerty, zabawy taneczne, wystympy kapel Istebna, Zwyrtni, zespołu Mała Istebna, wesołe miasteczko dlo dzieci, smaczne lody, chłódne piwko a przepyszne dania regionalne (karczek, placki, itd.) – czyli fajno impreza, jaki sie w lecie odbywajóm.
Ale w Istebnej mieli jeszcze cosi wiyncej – wybiyrali nejpiekniejszóm Góralke. Do ostatnigo miejsca zapełnióno widownia w niedzielne popołedni klaskała ośmiu szumnym dziywczyntóm z Koniakowa i z Istebnej.
Partycja Bury, kiero wygrała konkurs piękności łónskigo roku, nasadziła koróne na głowe Wiktorii Gruszce z Koniakowa. Tytuł miss warkocz zyskała Natalia Sikora z Istebnej, w kategorii nejpiekniejszy uśmiych wygrała Julia Polok z Istebnej a z tytułu miss publiczności sie radowała Karolina Fiedor z Koniakowa.
Komentáře
